ശ്രീനഗർ: ഡൽഹി ചെങ്കോട്ട ചാവേർ സ്ഫോടനവുമായി ബന്ധപ്പെട്ട് ജമ്മു കാഷ്മീരിൽ പുൽവാമ, ഷോപിയാൻ എന്നിവിടങ്ങളിലുൾപ്പെടെ എട്ടിടങ്ങളിൽ ദേശീയ അന്വേഷണ ഏജൻസി ഇന്നലെ റെയ്ഡ് നടത്തി.
ഷോപിയാനിൽ മൗലവി ഇർഫാൻ അഹമ്മദ് വാഗെയുടെ വസതിയിലും എൻഐഎ റെയ്ഡ് നടത്തി. രാജ്യത്തെ വെള്ളക്കോളർ ഭീകരതയുടെ മുഖ്യ ആസൂത്രകരിൽ ഒരാളാണ് മൗലവി ഇർഫാൻ അഹമ്മദ് വാഗെ എന്ന് ഡൽഹി സ്ഫോടനത്തിനുശേഷം എൻഐഎയ്ക്കു വിവരം ലഭിച്ചിരുന്നു.
ഒക്ടോബറിലാണ് വാഗെയെ എൻഐഎ കസ്റ്റഡിയിലെടുത്തത്. പുൽവാമയിലെ കോയിൽ, ചന്ദ്ഗാം, മലംഗ്പോറ, സംബൂറ എന്നിവിടങ്ങളിൽ വാഗെയുമായി ബന്ധം പുലർത്തിയിരുന്നവരുടെ വസതികളിലും ഡൽഹി സ്ഫോടനവുമായി ബന്ധപ്പെട്ട് ഉത്തർപ്രദേശിലെ സഹരൺപുരിൽനിന്ന് എൻഐഎ അറസ്റ്റ് ചെയ്ത ഡോ. അദീൽ അഹമ്മദ് റാത്തറിന്റെ വസതിയിലും എൻഐഎ ഇന്നലെ റെയ്ഡ് നടത്തി.